Tantara wan Pulisi Bakalahi, Satpam nang Manang

Takisah di muka Bank BRI, Su Ijak nang bagawi tantara wan Su Adul nang bagawi pulisi lagi bakalahi pandir. Buhannya badua ne bapakaian dinas langkap. Pukuknya liwar sasambatan, kada nyaman didangar. Pina bapanas sudah, lalu kaduanya tapaimbai mancabut pistol.

Balum sawat nang badua ne manimbak, kaluar satpam bank. Satpam ne bemamai kada baampihan lawan nang badua tadi. Urang-urang nang manonton pina takutan, kalo takana pilur sasat mun sawat batitimbakan. Tatap haja nang badua ne bakarasan kada baampihan. Rupanya satpam ne taumpat panas juwa, kada kawa manahan imusi. Langsung sidin manampar kaduanya. TAPAUUUU TAPAUUUUU. Langsung hinip badudua. Kaduanya ne manyimpani sinjata masing-masing ka dalam sarungnya, sambil batundukan haja. Kada lawas bajauhan pada tikapi.

Kabalujuran panuntun nang malihat kajadian tadi tabuat wartawan. Lalu wartawan ne baparak manakuni satpam tadi. “Ulun salut wan kawanian bapa, padahal buhannya tu tantara wan pulisi. Nangapa amalan pian maka wani wan buhannya tu?”

Pina santai ha satpam ne manjawap, “Buhannya badua tu anakku, matan halus sudah bakalahi kaetu, mun kada ditampar kada ampih inya bakalahi!”